Struktura e Posaçme kundër Korrupsionit dhe Krimit të Organizuar ka rilexuar pretencën në kuadër të dosjes “Metamorfoza”, pasi çështja për këta të pandehur u veçua nga pjesa tjetër e të akuzuarve.
Të pandehurit po gjykohen me procedurë të shkurtuar për veprat penale “Sigurimi i kushteve dhe mjeteve për të kryer vrasje”, “Grup i strukturuar kriminal” dhe “Mbajtja pa leje e armëve”.
Prokuroria e Posaçme ka kërkuar dënimin me 14 vite burg për biznesmenin Pëllumb Gjoka dhe 9 vite burg për ish-shefin e policisë Ardit Hasanbegaj.
Nëse shpallen fajtorë, ata do të përfitojnë nga gjykimi i shkurtuar, çka nënkupton uljen e një të tretës së dënimit.
Seanca e radhës u shty për më 9 mars, ku pritet paraqitja e konkluzioneve nga avokatët mbrojtës.
Ndërkohë, biznesmeni Pëllumb Gjoka, së bashku me disa të pandehur të tjerë, po gjykohet me procedurë të zakonshme në një dosje tjetër të operacionit “Metamorfoza”, që lidhet me vrasjen e Gjin Ndoji, i njohur edhe me mbiemrin Boriçi. a.b
