Gjatë ditës së sotme pritet të finalizohen procedurat e ekstradimit nga Dubai, Emiratet e Bashkuara Arabe, drejt Shqipërisë, të shtetasit Durim Bani, 47 vjeç, banues në Nikël, Krujë.
Në vijim të bashkëpunimit të ngushtë me partnerët ndërkombëtarë, autoritetet shqiptare kanë koordinuar veprimet për kthimin e tij në vend, ku do të përballet me drejtësinë.
Gjykata e Posaçme e Shkallës së Parë Kundër Korrupsionit dhe Krimit të Organizuar, me vendimin e datës 15.05.2024, i ka caktuar 47-vjeçarit masën e sigurisë “Arrest në burg”, për veprat penale “Sigurimi i kushteve dhe i mjeteve materiale për të kryer vrasje”, “Grupi i strukturuar kriminal”, “Kultivimi i bimëve narkotike” dhe “Kryerja e veprave penale nga organizata kriminale, ose grup i strukturuar kriminal”.
