Kryeministri Edi Rama ka reaguar lidhur me debatet për shembjet dhe dëmtimet e disa segmenteve rrugore në vend, duke krahasuar situatën me atë që, sipas tij, ka ndodhur edhe në Portugali si pasojë e të njëjtave fenomene natyrore.
Në një reagim publik, në X Rama u shpreh se është çudi e madhe mënyra se si po trajtohet çështja në Shqipëri, ndërsa në vende të tjera evropiane, si Portugalia, sipas tij, nuk po ndodh i njëjti reagim politik dhe mediatik.
“Çudi e madhe, në Portugali ka ndodhur kjo nga të njëjtat fenomene, po s’po e marr vesh se mirë opozita portugeze është në gjumë, mirë edhe ato pak tenxhere mediatike të Portugalisë janë me temperaturë të ulët e s’ka vend për gjithë këtë rrugë të re, po si ka mundësi që opozitat e këtushme nuk e kanë denoncuar akoma në SPAK këtë vepër të korrupsionit”, u shpreh Rama me tone ironike.
Ai vijoi më tej duke ironizuar debatin publik në vend, teksa përmendi “700 tenxheret e flakta të mexhelisit mediatik”, që sipas tij, nuk kanë thirrur ekspertët për të “nxjerrë faktet e tmerrshme që fshihen nën asfaltin e këtij korrupsioni qeveritar”.
Opozita ka ngritur akuza ndaj Ramës për keqmenaxhim dhe korrupsion në projektet infrastrukturore, pas dëmtimeve të konstatuara në disa akse rrugore në vend. Nga ana tjetër, qeveria ka argumentuar se problematikat janë pasojë e kushteve të jashtëzakonshme atmosferike dhe fenomeneve natyrore.
Në fakt i njëjti shi ka rënë edhe në rrugët e ndërtuara para vitit 2014 në Shqipëri, por nuk u ka ndodhur si në Portugali. a.b
