Segmenti rrugor në zonën e Arrës së Gurrës, në Librazhd, që ishte parashikuar të hapej gjatë ditës së sotme, nuk do të vihet në funksion për shkak të dëmtimeve të konstatuara në terren.
Autoriteti Rrugor Shqiptar (ARRSH), përmes një njoftimi të datës 23 shkurt, bën të ditur se segmenti ka pësuar defekte dhe fundosje, duke e bërë të pamundur hapjen e tij.
“Segmenti rrugor në zonën e Arrës së Gurrës në Librazhd pritej të hapej sot, mirëpo ka pësuar dëmtime dhe fundosje. Për këtë arsye, nuk mund të hapet gjatë ditës së sotme. Aktualisht segmenti është i pakalueshëm. Rruga dytësore ka pësuar rrëshqitje, duke dëmtuar edhe rrugën provizore, të ndërtuar më herët”, sqaron ARRSH.
Ndërkohë, Operatori i Sistemit të Transmetimit (OST) ka paralajmëruar pasoja edhe në rrjetin energjetik, si pasojë e shembjes së dherave në këtë aks. Sipas OST-së, ekziston rreziku i shembjes së një shtylle të tensionit të mesëm, ndaj do të ndërhyhet për demontimin e saj dhe për tokëzimin e linjës 110 kV.
“Ju njoftojmë se, në kuadër të punimeve për demontimin e shtyllës Nr.15, në linjën 110kV – 16/3a Librazhd – HEC Egnatia, në datën 23 shkurt 2026, nga ora 10:00 deri në orën 17:00, do të stakohet dhe tokëzohet Linja 10kV e Fiderit F3 Hotolisht të Nënstacionit Librazhd si dhe Linja 35kV e HEC-it Dragostunjë. Si rrjedhojë, gjatë këtij intervali kohor do të mbeten pa energji elektrike disa zona në rrethin Librazhd: Babje, Buzgar, Drapata, Dragostunjë, Ferrë, Frarë, Hotolisht, Gurëkuqe, HEC-i Xhyrë”, njofton OST-ja.
Kujtojmë se një ditë më parë, më 22 shkurt, u bllokua edhe rruga nacionale Librazhd–Prrenjas, pasi ura në këtë aks pësoi dëmtime të rënda. a.b
