Seksioni për Hetimin e Krimeve Ekonomiko-Financiare, në bashkëpunim me Prokurorinë e Tiranës, ka finalizuar operacionin e koduar “Audienca”, pas një hetimi me metoda proaktive për dokumentimin e paligjshmërive në një magazinë në kryeqytet.
Sipas autoriteteve, në ambientet e një subjekti me aktivitet ndërkombëtar në fushën e reklamimit dixhital, mbaheshin suplemente ushqimore dhe bimore të skaduara dhe të futura në mënyrë të kundërligjshme në vend.
Gjatë kontrollit në magazinë, specialistët gjetën dhe sekuestruan mbi 10 000 suplemente ushqimore dhe bimore, të cilat rezultonin të skaduara, pa pullën përkatëse të Agjencisë së Barnave dhe të Ministrisë së Financave, si dhe pa etiketa në gjuhën shqipe.
Në vijim të veprimeve procedurale, u shpall në kërkim administratori i subjektit, shtetasi nga Bosnja dhe Hercegovina, J. T., 53 vjeç, ndërsa u proceduan penalisht dy punonjës që ndodheshin në ambientet e magazinës, shtetasit J. G., 30 vjeç dhe M. Ç., 26 vjeç.
Policia bën me dije se vijon puna për kapjen e 53-vjeçarit, ndërsa materialet procedurale i janë referuar Prokurorisë së Tiranës. a.b
