Policia e Tiranës ka finalizuar operacionin e koduar “Metoda”, duke zbardhur tre vjedhje të kryera me kanosje me mjet prerës, ndërsa ka arrestuar autorin e dyshuar vetëm pak orë pas vjedhjes së fundit.
Sipas njoftimit zyrtar, shërbimet e Komisariatit të Policisë Nr. 4 ndërhynë menjëherë pas kallëzimit të një punonjëseje në një njësi të një kompanie telefonike në Rrugën e Dibrës, e cila deklaroi se mbrëmjen e kaluar ishte kanosur me thikë dhe i ishte vjedhur xhiroja ditore.
Si rezultat i veprimeve të shpejta hetimore dhe operacionale, u identifikua dhe u kap autori i dyshuar, shtetasi I. B., 30 vjeç, banues në Tiranë. Gjatë kontrollit, atij iu gjetën dhe iu sekuestruan shuma e parave të vjedhura, mjeti prerës i përdorur në krim, si dhe një aparat celular.
Nga verifikimet e mëtejshme ka rezultuar se 30-vjeçari dyshohet se, me të njëjtën metodë, ka kryer edhe dy vjedhje të tjera gjatë muajit dhjetor 2025, në dy subjekte të tjera, konkretisht në dy njësi të së njëjtës kompani telefonike dhe në një dyqan.
Policia bën me dije se vijojnë hetimet për dokumentimin e vjedhjeve të tjera që mund të ketë kryer ky shtetas, ndërsa materialet procedurale i janë referuar Prokurorisë së Tiranës për veprime të mëtejshme ligjore.a.b
