Berisha në konferencë shtypi
Kryetari i Partisë Demokratike, Sali Berisha, ka akuzuar qeverinë për vjedhjen e fondeve të destinuara për mbrojtjen e Durrësit nga përmbytjet, duke deklaruar se 42 milionë euro të paguara nga taksapaguesit shqiptarë nuk janë përdorur për qëllimin e tyre.
Në një deklaratë për mediat, Berisha pranoi se reshjet e fundit kanë qenë shumë intensive, por theksoi se Durrësi “kurrë nuk ka njohur një përmbytje të tillë”, duke shtuar se përmasat e situatës janë pasojë direkte e korrupsionit dhe keqmenaxhimit. Sipas tij, shkaku kryesor i kësaj gjendjeje është “vjedhja, vjedhja dhe vetëm vjedhja e fondeve publike”.
Berisha u ndal veçanërisht te problematikat e hidrovoreve, duke deklaruar se hidrovori i Porto Romanos funksionon vetëm kur niveli i ujit kalon mbi 70 centimetra, ndërsa ai i Hamallajt ka rreth tetë muaj që i ka pompat jashtë funksionit. Sipas tij, këto defekte e bëjnë të pamundur parandalimin në kohë të përmbytjeve.
Kreu i PD-së theksoi gjithashtu se Durrësi disponon një sistem kanalizimesh të mirëprojektuar, i cili sipas tij nuk funksionon për shkak se kanalet janë të bllokuara dhe nuk pastrohen. Ai akuzoi se fondet e parashikuara për mirëmbajtjen e tyre janë vjedhur nga ajo që e cilësoi si “mafia qeveritare e Durrësit dhe Tiranës”.
Berisha kërkoi shpalljen e gjendjes së fatkeqësisë natyrore, duke pranuar se përmbytjet kanë edhe shkak natyror, por theksoi se këto përmasa nuk do të ishin arritur nëse hidrovoret dhe sistemi i kanalizimeve do të ishin në funksion të plotë. Ai shtoi se nga Vora deri në bregdet shtrihet një rrjet kanalizimesh i ndërtuar për të mbrojtur zonën nga përmbytjet, por sipas tij, këto kanale janë “fiktive dhe të bllokuara”.
