Arrestohet në Pogradec 67-vjeçari, i dyshuar për abuzim seksual ndaj një të miture
Drejtoria Vendore e Policisë Korçë njofton se shërbimet e Komisariatit të Policisë Pogradec kanë ndaluar shtetasin Rushan Selko, 67 vjeç, banues në fshatin Piskupat, i dyshuar për një rast të rëndë abuzimi seksual ndaj një vajze të mitur.
Sipas njoftimit zyrtar, një 12-vjeçare ka kallëzuar se gjatë muajit gusht 2025, i moshuari ka kryer marrëdhënie seksuale pa dëshirën e saj në banesën e tij. Denoncimi është bërë në prani të prindërve, psikologut dhe prokurorit.
Ngjarja është zbuluar pasi prindërit vunë re ndryshime fizike te vajza dhe e dërguan për kontroll mjekësor, ku u konfirmua se ajo ishte shtatzënë. Pas kësaj, rasti u referua pranë organeve ligjzbatuese.
Burime hetimore bëjnë me dije se 67-vjeçari kishte njohje familjare me familjen e të miturës dhe dyshohet se e ka kërcënuar vazhdimisht vajzën për të mos treguar ngjarjen.
I dyshuari është arrestuar, ndërsa policia dhe prokuroria po vijojnë veprimet hetimore. Janë duke u marrë në pyetje familjarët dhe persona të tjerë që mund të kenë dijeni mbi rrethanat e rastit. Hetimet vijojnë për zbardhjen e plotë të ngjarjes. a.b
