Protesta e 22 dhjetorit
Policia e Tiranës ka arrestuar katër persona dhe ka proceduar penalisht shtatë të tjerë në lidhje me protestën e zhvilluar të hënën nga Partia Demokratike, e cila u shoqërua me akte dhune dhe përdorim të lëndëve djegëse molotov.
Sipas njoftimit zyrtar, në pranga janë vënë Albi Kryeziu, 39 vjeç, Erlis Sina, 36 vjeç, Xhekson Dedaj, 38 vjeç dhe Artan Hysenaji, 38 vjeç. Ndërkohë, shtatë protestues të tjerë do të hetohen në gjendje të lirë.
Mes personave të proceduar është edhe sekretari organizativ i PD-së, Ervin Minarolli, i cili, sipas policisë, nuk ka zbatuar detyrimet ligjore për identifikimin e personave përgjegjës për mbarëvajtjen e tubimit, në kundërshtim me ligjin nr. 8773 “Për tubimet”, neni 10.
Policia bën me dije se më datë 22 dhjetor 2025, rreth orës 18:00, Partia Demokratike zhvilloi një tubim në bulevardin “Dëshmorët e Kombit”, përpara Kryeministrisë. Gjatë protestës, disa pjesëmarrës kanë kundërshtuar punonjësit e Policisë së Shtetit të angazhuar për garantimin e rendit dhe sigurisë publike, duke hedhur drejt tyre lëndë djegëse molotov.
Nga veprimet hetimore janë identifikuar gjithsej 11 shtetas të përfshirë në veprime të kundërligjshme. Përveç katër arrestimeve në flagrancë, ka nisur procedimi penal për shtetasit B. F., E. M., M. M., Sh. D., K. P., R. B. si dhe për një 16-vjeçar.
Si pasojë e incidenteve, u lënduan tre punonjës policie, një fotograf dhe një protestues. Tre efektivët e policisë kanë marrë mjekim në spital dhe ndodhen jashtë rrezikut për jetën.
Grupi hetimor vijon punën për identifikimin e personave të tjerë që mund të kenë kryer veprime të paligjshme gjatë protestës, ndërsa materialet procedurale i janë referuar Prokurorisë së Tiranës për veprime të mëtejshme. a.b
