Specialistët e Sektorit për Hetimin e Krimit Ekonomik e Financiar, në Drejtorinë Vendore të Policisë Elbasan, në bashkëpunim me Prokurorinë Pranë Gjykatës së Shkallës Parë Elbasan, bënë ekzekutimin e masave të sigurisë “Arrest me burg” ndaj: Kristaq Piligriu, Argjir Panariti, Stavri Çipa dhe Gëzim Pitja. Policia po punon për kapjen e shtetasit në kërkim, D. K.
Arrestimi i tyre u bë pasi Gjykata e Rrethit Gjykësor Elbasan, ka caktuar masën e sigurisë “Arrest me burg”, për veprën penale ”Shpërdorim detyre” dhe “Shkelje të barazisë së pjesëmarrësve në tendera apo ankande publike” parashikuar nga nenet 248 dhe 258 të Kodit Penal.
Këta persona, duke qenë me detyrë Kryetar dhe anëtarë të Komisionit Vlerësimit të Ofertave, në Uzinën e Lëndëve Plasëse Mjekës, dyshohet të kenë shpërdoruar detyrën dhe shkelur barazinë e pjesëmarrësve në tendera për tenderin e zhvilluar për “Shitje skrapi dhe lëndëve plasëse TNT”, procedurat e tenderimit “Koncerti i trashëgimisë kulturore shqiptare” si dhe sponsorizime të tjera të kryera nga Uzina Lëndëve Plasëse Mjekës.
Të arrestuarit
Kristaq Piligriu, 59 vjeç, banues në Elbasan, me detyrë Kryetar i Degës Ekonomike në Uzinën Lëndëve Plasëse Mjekës.
Argjir Panariti, 64 vjeç, banues në Elbasan, ish-inxhinier në Uzinën e Lëndëve Plasëse Mjekës.
Stavri Çipa, 59 vjeç, banues në Elbasan, me detyrë Kryeinxhinier në Uzinën e Lëndëve Plasëse Mjekës.
Gëzim Pitja, 53 vjeç, banues në Elbasan, me detyrë inxhinier në Uzinën e Lëndëve Plasëse Mjekës.
Shpallur në kërkim
D. K., 64 vjeç, banues në Elbasan, me detyrë ish-Drejtor i Uzinës Lëndëve Plasëse Mjekës.
