Ministrja e Bujqësisë Anila Denaj vendosi sot pezullimin e inspektorëve të AKU dhe nismën e ripërtëritjes së burimeve njerëzore të kësaj agjencie në bashkëpunim me Universitetin Bujqësor.
“Në reagim të menjëhershëm të detyrave të ngarkuara dhe në përputhje me kompetencat dhe parashikimet ligjore dhe në veçanti duke marrë në konsideratë një rritje të ndjeshme të ankesave të subjekteve të lidhura me ushqimin, subjekteve të tregtimit të produkteve ushqimore dhe qasjen dhe sjelljen në bazë të këtyre ankesave të trupës inspektuese të Autoritetit Kombëtar të Ushqimit, mungesës së pajustifikuar të planeve të tyre operacionale, përgatitjen për zbatimin e plotë të ligjit për inspektimet në Republikën e Shqipërisë, adresimin e praktikave abuzive në përmbushje dhe kryerjen e detyrave inspektuese, rishikimin e mekanizmit të koordinimit ndërmjet strukturave rajonale, atyre qendrore të AKU-së, por dhe strukturave në Ministrinë e Bujqësisë dhe Zhvillimit Rural për të unifikuar dhe zbatuar një praktikë në frymë të ligjit për inspektimet, si dhe garantimit të transparencës dhe standardeve sipas kërkesave ligjore, kam urdhëruar pezullimin e ushtrimit të aktivitetit të inspektimeve pa planifikim paraprak dhe atyre të pamiratuara”, tha ministrja Denaj.
Në vijim ajo shpjegoi se ky urdhër njëkohësisht ka në bazë edhe ngritjen e një komisioni të posaçëm me pesë anëtarë. Unë këtu dua të falënderoj mbështetjen e Universitetit Bujqësor të Tiranës, i cili në përbërje të këtij komisioni do të ketë tre anëtarë dhe do të kryesohet nga profesor Iliri, komisioni do të vlerësojë në formë të shkruar dhe me gojë inspektorët e AKU-së.
“Ne kemi folur me profesorin që të mundësojmë kuota për studentët nga Universiteti Bujqësor i Tiranës. Le të mos harrojmë që ky universitet shumë shpejt ka të njehsuar certifikatën me një nga universitetet më prestigjioze në Evropë, që është Boku. Por dhe studentët që janë sot janë nga studentët më të mirë, të cilët i kemi punonjës, jo vetëm në Shqipëri dhe në shumë vende të botës dhe unë do të kisha nevojën, profesor, që ne të shikonim kuotat tona, që nga 100 kuota për çdo student që vjen nga Universiteti Bujqësor ta dyfishojmë dhe pse këtë mos ta bëjmë duke filluar nga AKU”, tha Denaj. a.b
