Një nga ngjarjet më të bukura teatrore të sezonit vjen në datat 17, 18, 19 dhe 20 qershor në Teatrin Kombëtar, me një komedi shpërthyese që premton të mbajë publikun të mbërthyer mes të qeshurave dhe situatave të çmendura.
Në qendër të kësaj komedie të mprehtë është një punonjës hoteli, i cili përfshihet pa dashje në një vorbull ngjarjesh absurde që nisin me një psikiatër ekscentrik dhe përfundojnë në një skenar që ngjan më shumë me një ëndërr të çoroditur sesa me realitetin.
Në skenë shfaqen personazhe të larmishëm: një sekretare e zhveshur që fshihet pas perdes së krevatit; një zonjë elegante e dehur e zhytur në përqafime të ndaluara; një profesor psikiatrie me fantazi surrealiste; dhe një polic që shpërthen në hapësirën e tyre pa paralajmërim.
Në sfond nuk mungon puroja e Çurçillit, që krijon një mjegull simbolike mes delirit, dëshirës dhe absurdit.
Komedia, e bazuar në një tekst mjeshtëror nga Joe Orton, eksploron me ironi të mprehtë temat e pushtetit, pasionit, marrëdhënieve njerëzore, epsheve dhe çmendurisë, përmes një humori të zezë dhe hiperrealist që s’e lë spektatorin të marrë frymë.
Kasti i aktorëve është fantastik, një kombinim i emrave të njohur dhe interpretuesve më të spikatur të skenës shqiptare, që i japin jetë kësaj satire brilante.
Mos e humbisni këtë përvojë unike teatrore – një festë për dashamirësit e komedisë dhe artit skenik.
Datat: 17–20 qershor
Vendi: Teatri Kombëtar
Biletat: Në shitje pranë teatrit dhe online. r.t
