Presidenti i serbëve të Bosnjës, Milorad Dodik, u dënua sot me një vit burg dhe u ndalua të angazhohet në politikë për gjashtë vjet, pas akuzave për veprime separatiste. Vendimi i gjykatës në Sarajevë vjen pas një procesi njëvjeçar, ku Dodik u shpall fajtor për mosbindje ndaj të dërguarit të lartë ndërkombëtar, i cili mbikëqyr paqen në Bosnje.
Udhëheqësi serb dhe avokatët e tij munguan në sallën e gjyqit gjatë dhënies së vendimit. Dodik e refuzoi dënimin dhe paralajmëroi “masa radikale” si përgjigje, përfshirë kërcënimin për shkëputjen e Republikës Srpska nga pjesa tjetër e Bosnjës.
Deklaratat e tij kanë shkaktuar alarm në vend, i cili ende mban plagët e luftës së viteve 1992-‘95, ku u vranë mbi 100,000 njerëz dhe miliona u zhvendosën. Marrëveshja e Dejtonit e ndërmjetësuar nga SHBA-ja i dha fund luftës, por tensionet etnike mbeten të larta.
