Një zjarr i përmasave tragjike përfshiu një hotel në vendpushimin e skive Kartalkaya në provincën Bolu, duke shkaktuar vdekjen e 66 personave dhe plagosjen e 51 të tjerëve. Ngjarja ndodhi në orët e para të së martës, në një kohë kur hoteli ishte i mbushur me pushues, përfshirë shumë familje që kishin ardhur për të shijuar pushimet dimërore.
Pamje tronditëse të filmuara me celular tregojnë vizitorë që lidhnin çarçafë për të dalë nga dritaret dhe të tjerë që bërtisnin për ndihmë. Në panik, dy persona humbën jetën pasi u hodhën nga katet e sipërme të ndërtesës, sipas deklaratës së guvernatorit të Bolut.
Baris Salgur, një punonjës në një hotel pranë vendngjarjes, tregoi se kishte dëgjuar britmat e njerëzve dhe ndihmoi në shpëtimin e disa prej tyre. “Pashë njerëz që bërtisnin nga dritaret. Para se të arrinte zjarrfikësja, dy gra u hodhën nga katet e sipërme,” tha ai.
Instruktori i skive Nejmi Kepcetutan tha se kishte ndihmuar për të shpëtuar rreth 20 vizitorë, duke përshkruar tymi mbytës dhe kaosin që pengonte daljen nga ndërtesa. “Ishte e pamundur të gjeje daljen e emergjencës,” theksoi ai.
Një tjetër dëshmitar, Ali Atmaja, tregoi për përpjekjet për të shpëtuar ata që hidheshin nga dritaret. “Ne vendosëm shtresa për t’i ndihmuar, por shumë jetë u humbën para syve tanë,” tha ai.
Prokuroria e Bolut ka nisur një hetim gjyqësor për ngjarjen, duke caktuar gjashtë prokurorë dhe një ekip ekspertësh për të përcaktuar shkaqet e zjarrit. Katër persona, përfshirë pronarin e hotelit, janë arrestuar në kuadër të hetimeve.
Presidenti Recep Tayyip Erdogan shprehu keqardhjen e tij për këtë tragjedi, duke garantuar një hetim të plotë dhe të paanshëm për të përcaktuar përgjegjësit.
Ngjarja përkoi me pushimet e shkollës, kur shumë familje ndodheshin në qendrën e skive për aktivitete dimërore. Në hotelin ku shpërtheu zjarri ndodheshin gjithsej 234 persona. r.b
