Pas kërkesës së kryeparlamentarit Ilir Meta, mësohet se deputetët e PD-së dhe LSI-së, anëtarë të komisionit parlamentar të reformës së drejtësisë, si dhe negociatorët e këtyre partive, janë mbledhur në ambientet e kryesisë së Kuvendit. Por me gjithë kohën e konsiderueshme të pritjes së tyre, ende nuk kanë mbërritur deputetët e PS-së.
“Nata ra’ siç e pata merakun…. Dhe, siç ia pata frikën pak orë më parë, po presim në Kuvend të mblidhet Komisioni i Posaçëm për të përfshirë në draft marrëveshjen e arritur pak orë më parë, se ndryshe nuk miratohet dot në seancën e nesërme…
Shokët e Partisë janë fshehur dhe nuk përgjigjen…
Mjerot anembanë kanë marrë porosi të raportojnë se ç’po bisedohet në … mbledhjen që ende s’po mblidhet…”, shkruan në “Facebook” deputeti demokrat Gent Strazimir, anëtar i këtij komisioni, i cili publikon edhe këtë foto.
“Alarmi” për moskonkretizimin e marrëveshjes konsensuale të arritur në mesditë, u bë prezent nga burime zyrtare të Konferencës së Kryetareve, e cila u mblodh pasdite për të vendosur sesi do të menaxhohet seanca e së enjtes.
Çështja kryesore e saj ishte votimi i ndryshimeve kushtetuese, por kryetarët e grupeve parlamentare janë përballur me faktin se në tryezën e punës nuk ka një draft që reflekton ndryshimet e dakordësuara.
Burimet konfirmojnë se Kryetari i Kuvendit, Ilir Meta i ka kërkuar komisionit të mblidhet urgjentisht me prezencën edhe të negociatorëve, me qëllim zbardhjen e marrëveshjes së arritur me ndërmjetësimin e Komisionerit për Zgjerimin, Johanes Hahn. Por ende, pas këtij apeli dhe pas pritjes së gjatë të pjesës tjetër të deputetëve e negociatorëve, të PD dhe LSI, ata të PS-së nuk po shkojnë.
/DRONI.al/
Për t’u bërë pjesë e grupit të "DRONI.al - Agjencia Kombëtare e Lajmeve" mjafton të klikoni: Join Group dhe kërkesa do t’ju aprovohet.
KOMUNITETI DRONI.AL: https://www.facebook.com/groups/426976918158037/
