Kryeministri Edi Rama duket se një pjesë të fjalimit të tij mbajtur sot në takimin me deputetë, ministra dhe drejtues të PS ia dedikoi kreut të bashkisë Erion Veliaj.
Rama nuk e përmendi me emrër por përdori fjalorin më të ashpër dhe përbuzës për ‘kryetarin e bashkisë hajdut’. Ne mes të kryetarëve socialistë të bashkive në hetim ka vetëm një që pritet të akuzohet si hajdut pas arrestimit të bashkëpunëtorëve të tij, Erion Veliaj.
“Ashtu sikur dikush që është zgjedhur në krye të një bashkie, nëse fut duart në arkat e këtij shteti dhe xhepat e këtij populli, nuk është me ne. Nuk ka se si të jetë ne dhe as se si të kërkojë gjë tjetër nga ne përveç përbuzjes. E thënë ndryshe, çdo anëtar i kësaj familjeje politike që bën korrupsionin në funksionet publike është një tradhtar i dyfishtë, jo vetëm i popullit shqiptar si çdo hajdut me kostum që merr çfarë nuk është e tij, por edhe i PS-së si çdo parazit që ushqehet me gjakun e trupit ku rritet.
…Unë nuk lëshoj vetëm djalin e vogël në ndonjë shkëmb mbi det kur do të hidhet. Por nuk mbaj asnjë burrë me para të vjedhura në karrige kur vjen ora të thirret. Jo po nuk kam bërë asgjë, po më bien në qafë. Nëse nuk ke bërë asgjë nuk të mbaj as unë as PS, por e vërteta. Prandaj lufto për të vërtetën tënde. Sepse kjo parti dhe kjo qeveri nuk bëjnë asnjë koment për çështjet që hap SPAK. Jo më avokatin e një drejtori, kryebashkiaku, ministri, deputeti apo ish ministri.” tha Rama. a.b
