Ka përfunduar Samiti i Ballkanit Perëndimor me BE për “Planin e rritjes ekonomike” i cili zgjati më pak se një orë dhe u diskutua për planin e rritjes ekonomike, si edhe procesin e integrimit të vendeve të Ballkanit Perëndimor në BE.
Komisioneri për zgjerim në BE, Olivér Várhelyi prezantoi në Samit planin e Unionit për vendet e Ballkanit Perëndimor përmes të cilit priter që vendet e rajonit do t’i dyfishohen ekonomitë në 10 vitet e ardhshme.
Varhelyi tha se ky plan do të funksionojë vetëm nëse vendet e Ballkanit Perëndimor do të zbatojnë rregullat e Bashkimit Evropian.
“Edhe pse ne po afrojmë fundin e mandatit tonë dua të lëmë diçka pas, diçka serioze, diçka që të jetë e prekshme, diçka që të jetë e ndjeshme për aspektin afatshkurtër dhe afatmesëm për zgjerimin.
Ky proces integrimi do të thotë që ekonomitë e Ballkanit Perëndimor dhe shoqëritë e Ballkanit Perëndimor të integrohen në BE, që do të thotë se edhe BE duhet që të ofrojë të gjitha përfitimet që sjell anëtarësimi përpara se vendet tuaja të bëhen shtete anëtarë të BE. Pra kjo është ideja jonë dhe që sjellim me planin e rtitjes.
Kemi besim që ju do merrni përfitimet e këtij plani, i cili ka mundësi që të kontribuoje në dyfishimin e ekonomive të Ballkanit Perëndimor.
Tashmë për planin e rritjes të gjitha vendet e rajonit e kanë marrë në dorë. Rajoni duhet të ecë përpara vetë me shpejtësi dhe kjo do të thotë që të arrihen rezultat në ato reforma që e bëjnë këtë plan funksional. Ky plan do të funksionojë nëse aplikon rregullat e BE, në rast se ju pranoni të gjitha këto rregulla dhe mund të bëheni pjesë e tregut përpara se ju të bëheni shtet anëtar”, tha komisioneri Varhely. a.b
