Tentuan të përfitonin nëpërmjet mashtrimit, një shumë të madhe parash, nga një subjekt privat, duke u prezantuar si zyrtarë të lartë të institucioneve, vihen në pranga 3 shtetas.
Në kuadër të operacionit “Tentativa” u arrestuan Ergys Ahmetaj, Andi Basha, Gëzim Kusi.
Sekuestrohen 89 400 euro dhe aparatet celulare të autorëve të dyshuar.
Ata kishin tentuar të mashtronin një subjekt privat, për të përfituar shumën 40 000 euro.
Si rezultat i operacionit policor të koduar “Tentativa”, falë veprimeve të shpejta profesionale dhe hetimore u bë kapja dhe ndalimi, për veprat penale “Mashtrimi”, mbetur në tentativë dhe “Grupi i strukturuar kriminal”, u arrestuan Ergys Ahmetaj, 21 vjeç, Andi Basha 18 vjeç, Gëzim Kusi, 19 vjeç.
Nga hetimet e kryera dyshohet se shtetasi F. Gj., 39 vjeç, i shpallur në kërkim gjatë operacionit “Subjekti”, i zhvilluar nga Policia e Shtetit, në datën 10 janar të këtij viti, është bashkëpunëtor me 3 shtetasit e lartpërmendur, të cilët u arrestuan në flagrancë gjatë operacionit “Tentativa”. Vijon puna për kapjen e shtetasit F. Gj.
Këta shtetas kanë tentuar të mashtrojnë një subjekt privat, për të përfituar shumën 40 000 euro, duke u prezantuar si zyrtarë të lartë të institucioneve dhe duke përdorur emra të ndryshëm.
Në cilësinë e provës materiale u sekuestruan 89 400 euro të gjetura gjatë kontrolleve të banesave dhe aparatet celulare të autorëve të dyshuar.
Materialet i kaluan Prokurorisë, për veprime të mëtejshme. a.b
