Legjenda e futbollit Edson Arantes do Nascimiento Pelé u nda sot nga jeta në moshën 82-vjeçare pas vuajtjes nga kanceri i zorrës së trashë.
Ylli brazilian e kishte luftuar këtë sëmundje që nga viti i kaluar dhe shëndeti i tij ishte komplikuar ditët e fundit. Ai kishte ndaluar së reaguari ndaj kimioterapisë dhe po merrte kujdes paliativ në spitalin Albert Einstein në Sao Paulo ku po kurohej prej muajit shtator.
Pele është golashënuesi më i mirë i të gjitha kohërave i kombëtares braziliane të futbollit me 77 gola në 92 ndeshje të luajtura, si dhe 3 herë fitues i kupës së botës në vitet 1958, 1962 dhe 1970. Askush tjetër nuk ka bërë më mirë se ai futbollin.
Ndërkaq Pele vlerësohet se ka shënuar një rekord botëror 1,281 gola në 1,363 paraqitje gjatë një karriere 21-vjeçare.
I vetmi lojtar që fitoi Kupën e Botës tre herë, duke ngritur trofeun në 1958, 1962 dhe 1970, Pele u shpall Lojtari i Shekullit nga FIFA në 2000.
