Prokuroria pranë Gjykatës së Shkallës së Parë Elbasan kërkoi sot të ekstradohet nga Shqipëria në Turqi shtetasi turk Faruk Fatih Özer, i biri i Zulkuf dhe Nursel.
Ai ka marrë masën e sigurimit “Arrest në burg” caktuar ndaj tij me vendimin e Gjykatës Penale të Paqit të Shkallës së Parë Nr.7 në Stambollin Anadollian në Turqi.
Ozer u arrestua me datë 30.08.2022, ora 16.20, nga ana e Oficerëve të Policisë Gjyqësore në Drejtorinë Vendore të Policisë Elbasan.
Arrestimi i tij është bërë pasi autoritetet e drejtësisë turke kanë shpallur në kërkim ndërkombëtar shtetasin e mësipërm, pasi ndaj tij autoritetet gjyqësore turke kanë caktuar masën e sigurimit “Arrest në burg”, për disa vepra penale të kryera në Turqi.
Ambasada e Republikës së Turqisë në Tiranë i ka përcjellë Ministrisë për Europën dhe Punët e Jashtme dokumentacionin e kërkuar për ekstradimin në Turqi të shtetasit turk Faruk Fatih Özer. Nëpërmjet kësaj note verbale kërkohet finalizimi i procedurave të ekstradimit në Turqi të këtij shtetasi.
Faruk Fatih Özer dyshohet nga Prokuroria Publike e Stambollit në Turqi për kryerjen e veprave penale: “Mashtrim duke përdorur si instrument sistemet informative, bankat ose institucionet kredidhënëse”, “Mashtrim i tregtarëve, drejtuesve të shoqërive tregtare dhe drejtuesve të kooperativave dhe “Krijim i organizatës kriminale”. a.b
