Kreu i PD, Sali Berisha komentoi sot shkarkimin e zv/kryeministrit Arben Ahmetaj. Kreu i mafies së djegësave është Edi Rama, tha Berisha në një deklaratë për shtyp të PD pak orë pasi kryeministri Edi Rama largoi nga qeveria zëvëndësin e tij.
Deklarata e Berishës:
Edi Rama, për të larë duart me krimin e tij të shëmtuar, aferën ndër më të mëdhatë në historinë e vendit, aferën e djegësave, ka shkarkuar Arben Ahmetajn.
Me këtë rast, unë duke e konsideruar Ahmetajn një nga eksponentët kryesorë të mafies së djegësve, shtoj se kreu i kësaj afere është një dhe vetëm një.
Ky është Edvin Rama. Në aferën e inceneratorëve ai ka firmosur siç ka pohuar vetë, në kundërshtim me ligjin.
Edi Rama ka firmosur në mënyrën më të paligjshme kontratën në shkelje të barazisë së ligjit për tenderat.
Ai ka firmosur kontratën për një kompani me zero eksperiencë në fushën e plehrave.
Kurrë një kryeministër, përveçse atij që vendos të vjedhë para me valixhe, nuk firmos një procedurë të tillë.
Edi Rama është koka e Meduzës e kësaj afere të tmerrshme.
Në rastin e inceneratorit të Tiranës, në shkelje të plotë, ai firmos bonus 8 pikë avantazh për kompaninë që u përdor për të gjitha vjedhjet.
Edi Rama ka pranuar se ka firmosur në mënyrë të paligjshme, por ka mohuar se njihte Gugalen, Zoton dhe Mërtirin, në një kohë kur në ligjeratën, apologjinë që i bënte vjedhjes së tij për inceneratorin e Elbasanit, ata ishin më të rëndësishmit në sallë.
Pra, ky është Edi Rama në raport me vjedhjen.
Duhet të informoj qytetarët se vjedhja në inceneratorin e Tiranës shkon, sipas KLSH, në 283 milionë euro. a.b
