Kreu i Partisë Demokratike, Sali Berisha, ka akuzuar kryeministrin Edi Rama dhe, sipas tij, lobistët e tij, për mungesë transparence dhe fshehje të situatës reale të procesit të integrimit të Shqipërisë në Bashkimin Europian.
Në një deklaratë gjatë mbledhjes së grupit parlamentar të PD, Berisha theksoi se sipas kalendarit zyrtar, sot duhej të mbahej konferenca ndërqeveritare mes Shqipërisë dhe Bashkimi Europian, por ajo nuk është zhvilluar.
Ai bëri të ditur se gjatë muajve të fundit janë zhvilluar një sërë takimesh në Bruksel lidhur me ecurinë e negociatave, të cilat, sipas tij, janë mbajtur larg vëmendjes publike dhe opozitës.
Sipas tij, një element kyç mbetet raporti i ndërmjetëm për sundimin e ligjit, i njohur si IBAR, për të cilin ai pretendon se nuk është arritur konsensus. Berisha deklaroi se janë zhvilluar gjashtë mbledhje për këtë raport, por pa një marrëveshje për miratimin e tij, ndërsa kërkesat ndaj Shqipërisë kanë ardhur në rritje.
Ai shtoi se, ndryshe nga Shqipëria, vende të tjera të rajonit kanë avancuar në këtë proces dhe kanë marrë vlerësime pozitive më herët, duke theksuar se mungesa e progresit lidhet me problematika të brendshme.
Në deklaratën e tij, Berisha kërkoi më shumë transparencë nga institucionet shqiptare dhe u bëri thirrje institucioneve të BE-së që procesi i integrimit të jetë i hapur për qytetarët.a.b
