Pas tre muajsh hetime intensive, Seksioni për Hetimin e Narkotikëve, në bashkëpunim me Prokuroria e Tiranës, ka finalizuar operacionin policor të koduar “Final”, duke goditur disa grupe që merreshin me shitjen e lëndëve narkotike në Tiranë.
Nga hetimet janë identifikuar 36 shtetas, të cilët vepronin individualisht ose në grupe, duke shpërndarë lloje të ndryshme droge. Në kuadër të operacionit është ekzekutuar masa e sigurisë “Arrest në burg” për 15 prej tyre, ndërsa 16 të tjerë janë shpallur në kërkim. Gjatë periudhës hetimore janë arrestuar edhe 5 persona të tjerë.
Personat për të cilët është dhënë masa e sigurisë janë: A. Sh., 31 vjeç; I. B., 66 vjeç; V. A., 29 vjeç; Xh. Gj. (B)., 26 vjeç; J. I., 28 vjeç; E. O., 47 vjeç; A. Ç., 42 vjeç; A. G., 41 vjeç; K. N., 26 vjeç; A. C., 21 vjeç; S. D., 32 vjeç; E. M., 29 vjeç; E. H., 25 vjeç; E. I., 30 vjeç dhe G. H., 37 vjeç.
Gjatë kontrolleve fizike dhe në banesa, si gjatë hetimeve ashtu edhe në momentin e arrestimeve, policia ka sekuestruar një sasi të konsiderueshme lëndësh narkotike dhe sende të kundërligjshme. Konkretisht, janë gjetur 60 kilogramë e 300 gramë Cannabis Sativa dhe 2 kilogramë e 50 gramë kokainë. Po ashtu, janë sekuestruar 4 armë, nga të cilat një pistoletë dhe tre armë gjahu, si dhe shuma të mëdha parash: 121 mijë euro, 60 milionë lekë dhe 5000 paundë. Në cilësinë e provave materiale janë marrë edhe 14 celularë, peshore elektronike dhe 3 automjete.
Gjatë hetimeve janë identifikuar dhe arrestuar edhe shtetasit A. M., E. K., A. K., E. M. dhe I. C., si pjesë e këtyre grupeve kriminale.
Policia bën me dije se vijon puna për kapjen e 16 personave të shpallur në kërkim dhe për dokumentimin e plotë të kësaj veprimtarie kriminale. Materialet procedurale i janë referuar Prokurorisë së Tiranës për veprime të mëtejshme.
