Kreu i PD, Sali Berisha tha sot gjatë një takimi me banorë të Durrësit se ajo që po i ndodh qytetit është barbari. Vjedhja dhe korrupsioni po i zhduk vlerat. Këtë s’e kanë bërë as pushtuesit!
Çfarë tha Berisha:
Demokratët dhe jo vetëm ata, janë në një mision të një rëndësie të jashtëzakonshme, misionin e shpëtimit të Shqipërisë, shpëtimit të Durrësit nga rreziqe të cilat nga disa aspekte, po të shohim Durrësin, po të shohim në shumë dimensione, nuk ia kanë bërë as pushtuesit e tij. Ajo që ndodh në Durrës është një, në kuptimin më të mirëfilltë të fjalës, është një barbari. Ato janë vlera të cilat nuk janë demokrate, as socialiste, janë vlera të përjetshme, i ka sjellë Durrësi dhe durrsakë në shekuj dhe mijëvjeçarë dhe tani për shkak të korrupsionit, të vjedhjes, kërkohet që gjithçka të transformohet dhe të zhduket.
Ilirjana Kuçana: Sot lind “Fronti për Mbrojtjen e Durrësit”. Të bashkohen të gjithë qytetarët për të mbrojtur të ardhmen e fëmijëve të tyre!
Dua të bëj një thirrje shpirtërore për të gjithë ata që na ndjekin, sot lind Fronti për Mbrojtjen e Durrësit. Dua të bëj një thirrje shpirtërore për të gjithë qytetarët durrsakë, gjithë intelektualëve që ndjejnë përgjegjësi se duhet të kontribuojnë për të shpëtuar Durrësin, por mbi të gjitha për të shpëtuar të ardhmen e fëmijëve të tyre, në mënyrë që të rezistojmë dhe në mënyrë që të mbrojmë Durrësin. Sot pashë shumë të rinj që s’i kam parë më parë, që janë bërë pjesë e PD dhe kjo vërteton atë që kemi thënë në fillim se sot jemi më të fortë, më të hapur dhe më të bashkuar. Por ne duhet të jemi akoma edhe më të bashkuar për shpëtimin e Durrësit dhe të Shqipërisë. m.k
