Ish kryeministri Sali Berisha duke folur për emisionin “Drejt” në RTV Ora tha se Lulzim Basha kishte propozuar më hertë koalicion me qeverinë e Ramës.
“Ka patur parime, të cilat ai i dinte se po t’i shkelte, unë nuk i pranoja. Një nga këto ishte koalicioni me Edi Ramën. Mua më është kërkuar një gjë e tillë dhe kam refuzuar në mënyrë kategorike”, deklaroi Berisha. Ish kryeministri nuk ka përcaktuar për periudhën që bëhet fjalë por ndërkohë këto kohë po flitet për një përfshirje të mundshme të Bashës në qeveri ndërsa Rama e ka kërkuar disa herë publikisht një gjë të tillë përmes asaj që ai e thërret bashkëqeverisje apo zona e qendrës së elektoratit të PS-së.
Në vijim të intervistës Berisha tha se Basha nuk firmos dot kandidatura për shkak se është shkarkuar nga detyra.
“Eshtë shumë e qartë se kush është Partia Demokratike. Nuk ka asnjë alternativë tjetër sepse Basha përfaqëson pengun e Ramës dhe asgjë tjetër. Basha ka bërë një anti-kuvend. Basha nuk firmos dot kandidatura. Kryetari nuk mund të thotë se nuk pa deklarimin e delegatëve që i shiti nga 1950 për 5004. Basha është një uzurpator i Edi Ramës dhe përfaqësuesi i PD-së është komisioni”, deklaroi Berisha. a.b
