Dyshime të forta për njëanshmëri të SPAK përgjatë procesit të hetimit dhe vendimarrjes në lidhje me inceneratorët.
Në një koment të publikuar sot nga gazetari Klodian Tomorri thuhet se ngrirja e aseteve të kompanisë se djegësit të Elbasanit nuk e pengon qarkullimin e parave për kompanitë e tjera që janë e njëjta gjë.
”Kur lajmëroi masat bllokuese ndaj inceneratorëve, SPAK bëri një hile djallëzore, që në atë kohë nuk i vuri askush rëndësi. Për djegësin e Elbasanit, i cili kishte mbaruar punë dhe kishte marrë të gjitha pagesat nga buxheti i shtetit në vlerën 22 milionë euro, SPAK vendosi të sekuestrojë kompaninë që zotëron koncesionin, pra Albtek Energy. Por në rastin e Fierit, ku pagesat nuk kanë mbaruar dhe buxheti vazhdon të paguajë edhe tani, SPAK nuk bllokoi llogaritë e kompanisë që ka koncesionin Integrated Waste Treatment Fier, por bllokoi mëmën e saj, Integrated Technology Services. Ndërkohë që tek inceneratori i Tiranës nuk u fut fare. Kjo nuk ishte e rastësishme.
Bllokimi i llogarive të mëmës nuk e pengon aspak bijën. Sipas ligjit, personat juridikë, kanë identitete të ndryshme dhe të pavarur nga njëri tjetri. Si rezultat, ajo që ndodh tani është një fëlliqësirë e paparë dhe e padëgjuar në asnjë vend të botës.
SPAK mban të bllokuara llogaritë e kompanisë mëmë Integrated Technology Services, të cilat janë bosh dhe pa asnjë funksion, ndërkohë që buxheti vazhdon i paguan para bijës, Integrated Waste Treatment Fier. Kjo e fundit i merr paratë, që vidhen nga qytetarët dhe i çon në llogari të fshehta ose vazhdon të bëjë pagesa lirshëm për të korruptuar zyrtarë, media dhe gazetarë. Me pak fjalë, vjedhja vazhdon nën hundën e prokurorëve të SPAK.
Nëse SPAK nuk vë sa më parë nën sekuestro llogaritë e kompanive koncesionare, llogaritë individuale të pronarëve të tyre si dhe të gjithë zinxhirin e llogarivë të përshira në transaksione me inceneratorët, me ligj ata quhen bashkëpuntorë në vjedhje. Këtë e thotë ligj. Çdo person që dyshohet për një krim të tillë, i sekuestrohet për efekt hetimi çdo instrument që mund të pengojë hetimin apo të thellojë pasojat e krimit. Në këtë rast qeveria paguan lekët vetëm për administrimin e përkohëshëm të kompanive dhe çdo pagesë tjetër ngrin”, shkruan gazetari Klodian Tomorri. m.k
