FOTO & VIDEO GALERI/ Grabitësit e bankës mohojnë akuzat në gjykatë

Iframe
Iframe
Image GalleryGjykata e Tiranës ka lënë në burg tre të arrestuarit për grabitjen e bankës në ish-Bllok, Roland Liti, Alan Babameto dhe Robert Kulla. Për Robert Kullën gjykata ka caktuar masën e sigurisë “30 ditë burg.”
Robert Kulla, së bashku me Roland Liti dhe Alan Babameton, janë paraqitur sot për masën e sigurisë në gjykatë. Të tre ata mësohet se kanë mohuar akuzat, ndërkohë që prokurori i çështjes ka kërkuar “arrest me burg”.
Robert Kulla, djali i figurës së njohur të botës së krimit të viteve ’90 Nehat Kulla, ka qenë i pari që është paraqitur këtë të shtunë në gjykatë për masën e sigurisë.
Kulla akuzohet si personi që organizoi dhe ekzekutoi në bashkëpunim me persona të tjerë planin për grabitjen e filialit të një banke në zonën e ish-Bllokut. Sikurse edhe para oficerëve të policisë gjyqësore, Kulla ka mohuar përfshirjen në këtë grabitje.
Avokati i tij deklaroi para trupit gjykues se Kulla me datën 6 Gusht kishte qenë në një resort në Shëngjin.
Nga ana e tij, duke iu përgjigjur pyetjeve të akuzës, Roland Liti ka deklaruar se natën e grabitjes ishte me vajzën e tij, duke festuar ditëlindjen e saj dhe se në Mal të Zi kishte shkuar për të shoqëruar disa shokë të ardhur nga Gjermania, me paratë e tij.
“S’kam lidhje me grabitjen. Gjurmët s’janë të miat. Atë ditë kam festuar ditëlindjen e gocës. Këto që thotë prokuroria janë gënjeshtra”, deklaroi Liti.
Tre të rinjtë u arrestuan pasditen e së mërkurës. Policia gjeti gjatë kontrollit të banesave të tyre 16.730 dollarë amerikanë, 10.480 euro dhe 262 mijë lekë, si dhe prova të tjera të krimit si sende që shërbejnë për hapje dyersh, brava dhe çelësa të ndryshëm.