Rama dhe Mitsotacis gjate takimit perpara nisjes e samitit te NATO-s
Kryeministri Edi Rama dhe homologu i tij grek Mitsotakis kanë rënë dakord të përshpejtojnë negociatat për përfundimin e një marrëveshjeje të përbashkët në lidhje me kufirin detar mes dy vendeve.
Dakordësimi lidhet me shpejtësinë e dërgimit të dosjes në Gjykatën Ndërkombëtare të Drejtësisë në Hagë.
Çështja u diskutua midis dy liderëve përpara fillimit të Samitit të NATO-s në Bruksel.
Mitsotakis përsëriti mbështetjen e palëkundur të Greqisë për kursin evropian të vendeve të Ballkanit Perëndimor, theksoi gazeta greke “Kathemerini”. Burime qeveritare thanë për median greke se Rama falënderoi kryeministrin për dhënien falas të 20,000 vaksinave që u dorëzuan sot (të hënën) në Shqipëri.
“Mitsotakis vuri gjithashtu në dukje interesin e palëkundur të Greqisë për pakicën kombëtare greke në Shqipërinë e Jugut, si dhe përparimin e Shqipërisë në fushat e të drejtave të njeriut dhe sundimit të ligjit, të cilat janë ndër parakushtet që BE ka kërkuar nga Shqipëria për përparimin në bisedimet e saj të pranimit”, tha zyra për mediat e kreut të qeverisë greke. a.b
