Kreu i PD, Lulzim Basha tha sonte se do të ketë pjesëmarrje masive në votime për të larguar Ramën.
Lulzim Basha: Dhe unë kam shumë besim që ditën e diel ne do të kemi pjesëmarrjen më masive popullore në kutitë e votimit, sepse këto janë zgjedhjet më të rëndësishme për Shqipërinë. Në këto zgjedhje do të vendoset nëse do të vazhdohet edhe 4 vite të tjera si këto 8 që lamë pas apo nëse Shqipëria do të ndryshojë?! Në këto zgjedhje do të vendoset nëse Shqipërisë do ti hapet rruga drejt anëtarësimit në Bashkimin Europian apo do vazhdojë të ngelet në vendnumëro duke hapur çdo 6 muaj shampanjën dhe ndërkohë duke hapur, duke qarë zemrat e nënave me 500 mijë të rinj që kanë emigruar për 8 vite.
Eni Vasili: Si do ta mbroni këtë?
Lulzim Basha: Këto zgjedhje nuk janë as për Partinë Demokratike as për Partinë Socialiste. Këto zgjedhje janë për shqiptarët dhe Partia Demokratike me programin e vet, me ekipin e vet dhe me të gjithë organizimin e vet është në funksion të zgjidhjeve për shqiptarët.
Basha në vijim tha se fronti i opozitës është shumë i gjerë përfshi socialistë dhe administratë
Lulzim Basha: Kurrë më parë nuk ka qenë përballja midis një njeriu dhe një pakice që ka përfituar nga pushteti i tij dhe një shumice absolute ku janë tashmë jo vetëm demokratët por edhe socialistët, vëllezërit dhe motrat tona. Edhe administrata publike që e kuptojnë se këtij i ka ardhur fundi dhe me 25 prill do t’i vijë fundi politikisht me votën më masive popullore. Janë zgjedhjet më të rëndësishme dhe do të kenë pjesëmarrjen më masive. Ndërsa ne zoti Kikia do të kemi fitoren më të thellë si forcë politike, si koalicion. Fitoren që në fakt do t’i takojë gjithë shqiptarëve.
