Klevis Alla, 22 vjeç është një i penduar i Drejtësisë. Ai ka pranuar të bashkëpunojë dhe dëshmia e tij, të paktën deri tani ka dhënë sukses në hetimin e vrasjes së vëllezërve Besmir dhe Viktor Haxhia.
Por, diskutimet janë vënë mbi dëshminë e dhënë nga Alla. Sipas asaj që ka deklaruar Klevis Alla, duket se krimi ka qenë vetëm në “terren shqiptar”.
“Ne jemi një grup që merremi me vjedhje makinash dhe i dërgonim për t’i modifikuar tek servisi i Dorjan Shkozës dhe vëllezërve Haxhia. Me Besmirin jemi prishur për një konflikt që patëm për një makinë. Besmiri nuk na i dha paratë e një makine siç kishim rënë dakord. I kërkuam paratë por Besmiri nuk na i dha. Me Viktorin nuk kemi patur probleme, por qëlluam për të mos lënë dëshmitarë”, ka deklaruar Klevis Alla para policisë.
Ndërkohë, ai është shprehur se për vrasjen e Dorjan Shkozës dhe Anxhelo Avdisë kishin marrë porosi.
Ndërkohë, prokuroria është duke hetuar edhe një pistë tjetër për shkakun e vrasjes së vëllezërve Haxhia, e cila lidhet me grabitjen e 5 milion eurove në Rinas.
/DRONI.al/
