Vijon monitorimi me radar i segmentit që deri pak javë më parë shumë drejtues mjetesh e përdornin për gara shpejtësie. Kështu thotë policia e cila gjatë natës mes të premtes dhe të shtunës është ndalur në kontrollet me radar në aksin Sauk-Teg.
Bëhet me dije se në këtë aks ku si rezultat i monitorimit të pandërprerë më radar u pezulluan qindra leje drejtimi dhe gjatë tre muajt e fundit, kjo është kthyer në normalitet.
Për 240 minuta monitorim me radar u evidentuan vetëm katër shkelës të sinjalistikës për shpejtësi, nga këta: tre me masë administrative pa masë plotësuese pezullim të lejes së drejtimit dhe një për shpejtësi tej normave të lejura 158 km/h, të cilit ju tërhoq leja e drejtimit.
Lajm shumë i mirë për të gjithë, sipas policisë, është se tashmë vëmendje e kontroll të pandërprerë do të ketë edhe në rrugët interurbane Tiranë- Durrës- Tiranë, Elbasan, por jo vetëm, pasi kontroll në ditët në vijim me radar do të vijojë në të gjithë vendin.
Njësia Operacionale e Policisë Rrugore në bashkëpunim me Drejtoritë Vendore të Policisë në qarqe, do zhvillojnë monitorime e kontrolle të befasishme, me qëllim parandalimin e aksidenteve rrugore.
“Shpejtësia vret jetë, shpejtësia s’të çon në destinacion, shpejtësia të lë me këmbë pasi patentën ta merr polici, rregulli të garanton jetën, destinacionin dhe patentën. Drejtues mjetesh, respektoni sinjalistikën, mbroni jetën e pastaj mbroni dhe patentën, por mbroni jetën tuaj e të përdoruesve te tjerë të rrugës. Radari dhe Polici rrugor tashmë janë kudo, mos u befasoni por respektoni rregullat e kodit rrugor, që të arrini në destinacion shëndoshë dhe me patentën në xhep”, deklaron policia.
https://www.facebook.com/1502420603377639/videos/2740434592842967/
/DRONI.al/
