Një aksident i rëndë ka ndodhur gjatë mbrëmjes.
Një turist zviceran i cili udhëtonte me motor ka dalë nga rruga dhe ka rënë në një gremine pranë shtratit të lumit Kir në Shkodër, në aksin rrugor Prekal-Kir.
Shkak për këtë aksident mësohet të jetë bërë humbja e kontrollit të mjetit. I plagosuri ka marrë plagë të rënda dhe është dërguar me urgjencë në spital.
Njoftimi i Policisë së Shkodrës
Rreth orës 19:30, në rrugën Shkodër- Bregu i lumit, në vendin e quajtur Prekal, shtetasi zviceran J. B., 64 vjeç, banues në Zvicër, dyshohet se ka humbur kontrollin e drejtimit të motoçikletës dhe ka dalë nga rruga duke rënë rreth 12 metra në humnerën mbi lumin Kir.
Në sallën operative erdhi një telefonatë nga një banor i zonës i cili kishte parë ngjarjen. Menjëherë në drejtim të vendit të ngjarjes shkuan forcat e Policisë dhe në bashkëpunim me banorët e zonës, kanë bërë të mundur nxjerrjen e 64 – vjeçarit nga humnera duke e transportuar më pas në spital. Shtetasi zviceran ndodhet jashtë rrezikut për jetën dhe po merr trajtimin e duhur në spitalin Rajonal Shkodër
Policia e Shkodrës falënderon banorët e zonës për bashkëpunimin, kontributin dhe solidaritetin që treguan në këtë rast, por edhe në shumë raste të tjera të ngjashme.
Policia është e angazhuar në shërbim të qytetarëve, turistëve dhe vizitorëve dhe fton cilindo që të kontaktojë në numrin 112 apo nëpërmjet aplikacionit “Komisariati Dixhital”, për çdo problematikë ose shqetësim, duke premtuar reagim të shpejtë dhe të paanshëm.
