Ish-Ministri i Drejtësisë, Ylli Manjani ka një propozim që sipas tij duhet të kryhet menjëherë, tanimë që Gjermania vendosi “po” me kushte për Shqipërinë.
Ai thotë se vendit tonë i duhet me patjetër mbajtja e zgjedhjeve të lira dhe të ndershme. Ai thekson se këto janë principe bazike të demokracisë, që duhen aplikuar me çdo kusht.
Postimi i Manjanit:
Zgjedhjet e lira dhe shteti=Europa.
Qartësisht, nuk ka Europë pa shtet e pa zgjedhje të lira.
Duhet ta mbledhim mirë rradaken. Europa ka pranuar në gjirin e saj edhe shtete me ekonomi të dobët, por edhe shtete me konflikte minoritetesh e kufinj ndërshtetërore. Europa është gati të afrojë më shpejt edhe vende me korrupsion të lartë e ndikim Rus. Por, në të gjitha këto vende ka shtet dhe bëhen zgjedhje të lira. Në çdo vend ku bëhen zgjedhje në darkën e zgjedhjeve del rezultati.
Europa na e ka thënë qartë këtë gjë në mënyrë të përsëritur. Në vitin 1996, na u propozua marrëveshje sui generis për negociata anëtarësimi.
Bash kur punët po shkonin mirë i këpusim zgjedhjet katastrofë të ’96. Prodhuam parlamentin monist. Pra shkatërruam zgjedhjet. Një vit më vonë, në ’97 shkatërruam edhe shtetin. Sigurisht Europa na u largua politikisht, deri në 2006 kur u nënshkrua MSA (Marrëveshja për Stabilizim e Asocim). Edhe kjo pas një procedure sui generis. Në çdo hap të procedurave të para, gjatë e pas MSA kushtet kanë qenë: zgjedhjet dhe shteti. Edhe sot po ato kushte janë. Mesa duket na kanë zënë ngushtë me këto dy gjëra…
