Presidenti turk, Erdogan dërgoi një kalibër të lartë për të fituar votimet për postin e kreut të bashkisë së Stambollit: Binali Yildirimin nga partia konservatore-islame, AKP. Yildirim konsiderohet mjaft besimtar, vjen nga provinca e Anadollit lindor, Erzincan, e krahas karrierës politike ai ka ngritur edhe një biznes për transportin me anije, të cilin e drejtojnë tani fëmijët e tij. Yildirim është politikan i vjetër e bashkë me ministrin e Financave, Berat Albayrak njëherësh edhe dhëndri i Erdoganit, janë bashkëudhëtarët më të rëndësishëm të presidentit, Erdogan.
Që nga vitet 90-të, këta dy burra të AKP i lidh një miqësi e fortë. Erdogan dhe Yildirim janë njohur në kohët, kur Erdogan drejtonte bashkinë e Stambollit. Atëherë Yildirim, një inxhinier anijesh drejtonte shërbimin e anijeve të qytetit, IDO. Kur Erdogan në vitin 2002 fitoi zgjedhjet parlamentare me AKP, e më vonë u zgjodh kryeministër, Yildirim u bë pjesë e rrethit të ngushtë të pushtetit.
Presidenti Erdogan e emëroi Yildirim si kryeministër. Lidhjen e tij me presidentin turk e tregoi qartë referendumi për kushtetutën në vitin 2017. Yildirim u angazhua fort në fushatë për futjen e sistemit presidencial, megjithëse sistemi i ri qeverisës që ai mbronte do të thoshte edhe fshirje të vetë postit të tij. Erdogan donte ta mbante me të gjitha mënyrat metropolin e Bosforit, sepse ai e di sa i rëndësishëm është metropoli 15 milionësh për mbijetesën e tij politike. Prandaj ai dërgoi aty “më të mirin”. Madje u shpërndanë edhe pllakate me Yildirimin që falënderonte votuesit.
Imamoglusë i dështon festa e fitores
Por pala e AKP-së u gëzua shumë herët. Një njeri i nënvlerësuar nga Erdogani, socialdemokrati Ekrem Imamoglu ishte i panjohur për turqit përtej Stambollit para zgjedhjeve lokale. Në fund ai fitoi me pak vota para Yildirimit dhe mund të fillonte nga detyra. Por një ankesë e presidentit tek Komisioni Zgjedhor solli anulimin e zgjedhjeve në fund të marsit dhe nevojën për një votim të ri.
Imamoglu ka qenë për 5 vite kryetar i minibashkisë, Beylikdüzu në lindje të Stambollit. Babai i tre fëmijëve vjen nga një qytet konservator, Trabzon në Detin e Zi. Ai është rritur në një familje afaristësh ndërtimi. Kandidati rival i Yildirimit njihet si liberal dhe progresiv, ai thekson në fushatë, se i qëndron besnik “traditës kemaliste”. Vlerat e demokracisë, përparimit, laicizmit dhe barazisë, që lidhen me themeluesin e shtetit modern turk, Kemal Atatürk janë të rëndësishme për të. Ajo që e ndihmoi Imamoglunë në fushatë ishte edhe talenti për t’u treguar i afërt me popullin. Në një kohë që përfaqësuesit e partisë, CHP shpesh duke elitarë dhe të ngurtë, Imamoglu e flet gjuhën e njerëzve të thjeshtë.
Kandidati i CHP-së u flet grupimeve të ndryshme
Megjithë orientimin e tij progresiv, Imamoglu perceptohet edhe si besimtar konservator. Gjatë fushatës në mars që qëlloi me muajin e Ramazanit ai fitoi pikë me agjërimin tek shtresa e besimtarëve. Imamoglu festonte ritualin e prishjes së agjërimit me familjet e Stambollit, e citonte sure të Kuranit.
Për shumë vetë Imamoglu është edhe një simbol i pajtimit. Në duelin televiziv me kandidatin Yildirim, ai theksoi, se do t’i japë fund polarizimit, dhe do të punojë për afrimin mes turqve. Këto fjalë tingëllojnë mirë si balsam për shpirtin e shumë turqve. Atyre u pëlqen një kandidat që reflekton dhe një njeri miqësor. Megjithë përsëritjen e zgjedhjeve papritur dhe humbjen e hidhur, ai kërkon sërish fitoren. Shanset nuk janë të këqija. Sondazhet e nxjerrin atë para rivalit Yildirim, avantazhi kap 6%. Tek Imamoglu varen shumë shpresa. Madje shumë vetë shohin tek ai fillimet e Erdoganit. Edhe ai në fillim simbolizonte ndryshimin, pas një lufte zgjedhore u ngjit në postin e kryetarit të bashkisë dhe nga ky pozicion përgatiti marrjen e postit në Ankara./DW
