Policia e Shtetit në bashkëpunim me prokurorinë kanë vënë nën sekuestro një hotel në ndërtim në zonën e Himarës.
Lajmin e ka bërë me dije vetë policia e cila sqaron se hoteli me një vlerë prej rreth 500 mijë eurosh ishte duke u ndërtuar në shkelje të ligjit. Policia citon nenet e kodit penal për falsifikimin e dokumentasve dhe shpërdorimit të detyrës.
NJOFTIMI I PLOTE
Himarë, Vlorë
Sekuestro Preventive për një hotel në ndërtim dhe truallin ku ndërtohet hoteli në Himarë.
Nga ana e Seksionit për Hetimin e Krimit Ekonomik e Financiar në Drejtorinë Vendore të Policisë Vlorë, në bashkëpunim me Prokurorinë e Rrethit Gjyqësor Vlorë, është bërë zbatimi i Vendimit Penal nr. 1314, datë 20.06.2019, të Gjykatës së Shkallës së Parë Vlorë, për vendosjen e sekuestros preventive mbi një objekt hotel në ndërtim.
Ky ndërtim ka qenë i lejuar me vendimin nr.64, datë 30.07.2018 nga ana e bashkisë Himarë dhe leja e ndërtimit është dhënë në favor të një shoqërie sh.p.k, me administrator shtetasin F. H., si dhe një sipërfaqe toke truall prej 700 m2, e ndodhur në Spile Himarë ku po ndërtohet ky hotel.
Vlera financiare e objektit dhe truallit kap shifrën rreth 500.000 euro.
Ky sekuestrim u bë në kuadër të procedimit penal nr. 342 viti 2019, për veprën penale “Falsifikimi i dokumenteve“ dhe “Shpërdorimi i detyrës” parashikuar nga nenet 186 dhe 248 të Kodit Penal.
