Prefekti i Qarkut Dibër nisur nga situata e krijuar nga helmimi masiv në lagjen e vjetër të Bulqizës, ka kërkuar nga institucione përgjegjëse të gjejnë sa më parë shkaqet dhe të mos delegojnë përgjegjësinë tek njëra-tjetra. Prefekti, Nexhbedin Shehu është shprehur se situata diuhet të zgjidhet sa më parë, pasi ende ka raste të personave me probleme shëndetësore.
“Ditë e gjashtë sot dhe ne akoma nuk dimë se çka ndodhur. Shqetësim është dhe duhet të gjejmë një zgjidhje. Një investigim duhet bërë, këto njerëz nga vijnë, çfarë kanë konsumuar, çfarë pinë, çfarë hanë. S’jam unë njeriu i përshtatshëm për ta bërë këtë punë. Duke qenë se dyshohet se është uji, ky ujë nuk duhet të konsumohet më, derisa të marrim analizat. Për njerëzit që nuk kanë para për ta blerë ujin, duhet t’u ofrojmë një autobot”, tha Nexhbedin Shehu , Prefekt i Qarkut Dibër.
Drejtori i Shëndetit Publik, Bulqizë, Flamur Meta, tha se analizat e para nuk e nxjerrin me problem ujin e pijshëm, megjithëse priten analiza të tjera. Sipas tij, AKU duhet të veprojë për ushqimin që nëse uji rezulton i pastër, të gjendet shkaku i helmimit masiv në Bulqizë.
“Nga analizat e para të ujit që ishte kundër bakteriologjisë rezulton pa ngarkesë mikrobiologjike. Instituti i shëndetit publik vijon më tej me analizat bakteriologjike. Tani duhet të kalohet në një aspekt tjetër të dyshimit, tek ushqimi”, tha Flamur Meta, Drejtor i DSHP, Bulqizë.
