Policia e Shtetit ka vazhduar me arrestimet e protestuesve që marrin pjesë në protestat e organizuara nga Opozita.
Në orët e funfit Policia e Shtetit ka arrestuar 8 persona, nga të cilat 7 i ka lënë në gjendje të lirë, ndërkohë që njëri prej këtyre protestuesve i identifikuar si Olsi Albajrami, 28 vjeç, është mbajtur në komisariat.
Midis personave të proceduar penalisht është edhe Sekretari i Përgjithshëm i Partisë Demokratike, Gazmend Bardhi.
Lidhur me procedimin e Bardhit, Policia në komunikimi paraprak për shtyp njofton se : Është proceduar në gjendje të lirë për veprën penale të “Organizimi dhe pjesëmarrja në grumbullime e manifestime të paligjshme”, shtetasi G.B., 33 vjeç, lindur dhe banues në Tiranë.
Gjithashtu në lidhje me protestën e sotme janë proceduar penalisht në gjendje të lirë edhe 7 shtetas të tjerë për veprat penale të “Kundërshtimi i punonjësit të policisë së rendit publik”, “Goditje për shkak të detyrës” dhe “Prishja e qetësisë publike”.
Policia sqaron gjithashtu se janë shpallur në kërkim dhe po punohet për ndalimin e tyre edhe për 4 shtetas të tjerë për veprat penale të “Organizimi dhe pjesëmarrja në grumbullime e manifestime të paligjshme”, “Kundërshtimi i punonjësit të policisë së rendit publik”, “Goditje për shkak të detyrës”, “Prishja e qetësisë publike” dhe “Shkelja e rregullave mbi lëndët plasëse, djegëse dhe radioaktive”.
