Kryeministri Edi Rama ia ka lënë sërish fajin universiteteve, duke shmangur kështu përgjegjësitë që i takojnë qeverisë në realizimin e kërkesave të studentëve.
Gjatë një takimi me pedagogë dhe studentë, Rama është i bindur se Universiteti nuk po i plotëson kushtet e shtruara nga studentët në protestat e dhjetorit, prandaj ka ‘kërcënuar’ këtë të hënë se qeveria po mendon t’u marrë kompetencat institucioneve të arsimit për t’i bërë vetë realitet ato.
Gjatë prezantimi të bilbiotekës dixhitale për universitetet, Rama tha se 3 nga 8 pikat e studentëve nuk po plotësohen pikërisht nga ana e zinxhirit drejtues të Universiteteve. 3 janë pikat që sipas Ramës nuk po marrin zgjidhje.
“Ne nuk mundet të ecim dhe të shkojmë asgjëkundi për të adresuar tre pika që mbeten në ajër që janë aspekte jetike për kalimin e universitetit në një stad të ri. Transparenca e titujve akademikë, është diçka që ministria nuk e bën dot vetë. Duhet ta bëjë çdo universitet. Nuk mund të ndërmerret kur rektorati i Universitetit të Tiranës bën sikur nuk dëgjon duke krijuar hapësirë për çoroditje. Së dyti vlerësimi nga ana e studentëve për performacën e pedagogëve, një kërkesë legjitime. Nuk po ndodh nuk shohim asnjë shenjë. E treta shqetësimi i studentëve për tregun e shitje së librave të pedagogëve në kërkim të notës. As kjo nuk po adresohet asgjëkundi.
Unë shpresoj të mos lindë nevoja që ne të ndërhyjmë në ligj. Po pres me durim të shohim që ky proces të hapet dhe kush kujton se kjo do harrohet e ka gabim. Kush kujton se do kërcënojë Qeverinë me inskenim e protestash që turbullojnë gjendjen e brendshme të universiteteve e ka gabim. Të treja ato që thash do të ndërhymë t’i bëjmë vetë, duke marrë kompetencat që sot i ka universiteti, por kjo nuk është më e mira që mund të bëjmë. Kjo duhet marrë nga universitetet”, tha Rama.
Kujtojmë këtu se më herët dhe universitetet paralajmëruan sërish protesta pasi nuk shohin të realizuar asnjë nga kërkesat e tyre përgjatë këtyre muajve.
