Policia e Tiranës vijon të vendosë gjoba për shkelësit e rregullave te qarkullimit rrugor.
Sipas policisë në disa prej kryqëzimeve të vendit vërehet një sjellje e patolerueshme nga drejtuesit e mjeteve e kthyer në fenomen shqetësues, parkime të gabuara në vende të palejuara ku shpeshherë kthehen në shqetësim edhe për lëvizjen e lirë të këmbësorëve.
Parakalime të gabuara që shkaktojnë trafik e vonesa për drejtuesit e rregullt të automjeteve, shkelje të semaforit apo shpejtësi tej normave të lejuara, si dhe përdorim të celularit gjatë drejtimit të mjetit duke u bërë burim potencial për aksidente rrugore.
Këto shkelje, do vijojnë të jenë prioritet i patrullave të policisë rrugore, të cilat përveç patrullimit me përzgjedhje, po aplikojnë edhe forma të tjera monitorimi me qëllim dokumentimin e të gjitha shkeljeve të rregullave të qarkullimit rrugor, përfshi edhe zonat të cilat nuk kanë mbulim policor të vazhdueshëm.
Falë bashkëpunimit me qytetarët që vazhdojnë të adresojnë çdo ditë e më shumë shkelje apo kundravajtje të ndryshme administrative në adresë të Policisë së Shtetit, parametrat e sigurisë rrugore po njohin përmirësim të vazhdueshëm në kryeqytet.
