Gjykata për Krime të Rënda vendosi të lerë në burg gjyqtarin e Fierit, Roland Hysi dhe psikologen Elona Mecani, të përfshirë në aferën korruptive të publikuar në një emision investigativ.
Mecani dyshohet se bënte rolin e sekseres, ndërsa në videon e bërë publike, gjyqtari Hysi, kërkon para dhe ndërkohë i kërkon seks nënës së divorcuar.
Seanca te Krimet e Rënda u zhvillua me dyer të mbyllura dhe ka zgjatur rreth 2 orë. Gjyqtari akuzohet për veprën penale ‘Ushtrimi i ndikimit të paligjshëm ndaj personave që ushtojnë funksione publike’. Po ashtu mbi gjyqtarin rëndon akuza ‘Korrupsioni pasiv i gjyqtarëve dhe prokurorëve të tjerë të drejtësisë’.
Po ashtu masa arrest me burg është caktuar edhe për psikologen Elona Meçani, e cila mori 500 euro të tjera për një gjyqtar tjetër, i cili në video thuhet se është Taulant Banushi, në mënyrë që ky i fundit të mos zvarrisë seancat në gjykatën e Apelit.
Prokuroria regjistroi sot procedim penal pas publikimit të videos në emisionin investigativ STOP, ku gjyqtari Roland Hysi merr 500 euro rryshfet dhe i kërkon favore seksuale një gruaje të divorcuar për ti dhënë kujdestarinë e fëmijës.
