Një shqiptar i dënuar me burg për vrasje në Belgjikë është mbrojtur nga bashkëshortja e tij belge, e cila i ka dërguar një letër gjykatës në seancën e fundit gjyqësore. 40-vjecari shqiptar, Erjon S. është dënuar për vrasjen e një prostitute, por gruaja e tij thotë në letër se pavarësisht të shkuarës së tij kriminale, ai është një baba i mrekullueshëm dhe i përkushtuar.
“Bashkëshorti im është një burrë i mrekullueshëm dhe baba i dashur. Fëmijët e mi nuk kanë pranë babanë e tyre dhe natën qajnë. Çdo mbrëmje ai na telefonon për të na pyetur si e kaluam ditën. Ne e vizitojmë çdo javë në burg. E dimë që ka bërë gabime, por unë e dua burrin tim- shkruan në letër bashkëshortja e shqiptarit.
40-vjeçari jetoi në Geluwe ku u martua dhe u bë baba i tre fëmijëve, dy djem dhe një vajzë. Për 9 vite askush nuk e kishte kuptuar se ai në fakt ishte një person tjetër dhe që kërkohej nga shteti italian, deri sa u zbulua nga autoritetet. Gjykata italiane lejoi që dënimin ta kryente në Belgjikë. Seanca e radhës gjyqësore ndaj tij është caktuar më 12 Nëntor.
