Presidenti Ilir Meta është takuar ditën e sotme me Atin e Shenjtë Papa Françeskun. Meta ishte i shoqëruar nga gjithë familja e tij, teksa për herë të parë pamë dhe në shoqërinë e tij, kryetaren e LSI Monika Kryemadhi.
Kujtojmë se Kryemadhi, kur Ilir Meta u zgjodh president, u shpreh se ajo nuk do të ishte zonja e parë. Nga ai moment e deri më tani, shoqëruesja e presidentit të shtetit ishte vajza e tij.
Por sot, në këtë ditë të veçantë për familjen presidenciale, Meta është shoqëruar dhe nga zonja e tij në një takim zyrtar, për herë të parë.
”Jam shumë i lumtur dhe i nderuar nga audienca e veçantë sot me Atin e Shenjtë, Papa Françeskun. Mirënjohje ndaj përkujdesjes së Tij të veçantë dhe Selisë së Shenjtë ndaj Shqipërisë, shqiptarëve, vokacionit tonë europian dhe vlerësimit të Tij ndaj lidhjeve të vjetra e personaliteteve që mbajnë fort këto lidhje, Gjergj Kastriot Skënderbeu, Shenjtorja Nënë Tereza, 38 Martirët e Kishës Katolike shqiptare.
Interesi dhe vëmendja e tij ndaj modelit e bashkëjetesës paqësore dhe harmonisë fetare në mes shqiptarëve ishin pjesë e bisedës së përzemërt dhe mbresëlënëse me Atin e Shenjtë!” shkruan Meta në facebook.
