Kryeministri Edi Rama ka bërë njoftimin surprizë të cilin askush nuk e priste. Gjatë takimit me koordinatorët e bashkëqeverisjes, Rama ka thënë gjatë trasmetimit live, se ka shkarkuar Drejtorin e Hipotekës së Fierit.
Kjo lëvizje nga ana e kryeministrit vjen pas denoncimit të një qytetari i cili ishte zvarritur për një kohë të gjatë për disa nga dokumenta lidhur me pronën e tij nga hipoteka e Fierit.
Pasi kryeministri ishte njohur me problemin, njoftoi live se kishte shkarkuar Drejtorin dhe kishte zgjidhur problemin e qytetarit.
Kujtojmë se Drejtori i Hipotekës në Fier ishte Petrit Kanani i cili u vendos në krye të ZVRPP në 18 janar të këtij viti.
Ja çfarë deklaroi Rama gjatë takimit:
”Po e them këtë meqë u dha rasti i një burri 77-vjec që solli dëshminë se ndryshe nuk do e thoja. Kemi pasur disa raste nga hipoteka e Fierit për çështje të pronësisë në tokën bujqësore.
Kur pashë raportin e sotëm kam kërkuar shkarkimin dhe hetimin për të gjithë përgjegjësit për këtë lloj zvarritje.
Ky është fakt se platforma jo vetëm zgjidh problemin po na ndez llampat e kuqe për aty ku duhet të ndërhyjmë falë faktit që qytetarët na drejtohen dhe nuk ka nevojë të bëjnë denoncime”.
