Prej 24 orësh zona e Shkodrës është mbërthyer nga forca të shumta policie të cilët janë në kërkim të autorit/ve për vrasjen e 30 vjeçarit, Arjan Ferracaku.
Ndërkohë policia dhe prokuroria i kanë përqëndruar hetimet në dy pista, atë të përplasjeve mes grupeve kriminale dhe një gjobëvënie të mundshme që mund ti jetë vendosur 30-vjeçarit, i cili ka kundërshtuar dhe nuk ka paguar.
VRASJA
Policia ka dalë në këtë konkluzion pasi, viktima nuk njihej si person me precedentë penalë apo që të jetë përplasur me grupet kriminale, por ka shumë gjasa se vrasja e tij mund të ketë ndodhur vetëm për shkak të gjobave financiare, pasi 30-vjeçari dhe babai i tij gëzojnë biznese të shumta në Shkodër, shkruan Shqiptarja.com.
Zona ku ka ndodhur krimi, njihet nga policia si vendi ku shpesh herë atentatorët kanë djegur makinat, menjëherë pasi kanë qëlluar objektivat e tyre. Ndërkohë mësohet se plumba veç Arjan Ferracakut ka marrë dhe kali i tij i hipizmit.
Dy personat që e shoqëronin Ferracakun mbi kalë fatmirësisht i kanë shpëtuar më së miri plumbave të kallashnikovit. Dy personat, mësohet se që nga dita e djeshme janë marë në mbrojtje nga policia e Shkodrës.
Kush është Arjan Ferracaku?
Ferracaku është një biznesmen. Ai zotëronte disa biznese të ndryshme në zonën e Shkodrës. Ishte pronar i hotel “Fantazia” në Velipojë dhe restorantit “Zus” që ndodhet sa kalon urën e Bunës në Shkodër. Ai ishte i martuar ishte babai i dy fëmijëve.
Përsa i përket familjes Ferracaku, ata njihen në Shkodër me reputacion të mirë, dhe jo konfliktualë. Ditën e sotme, në Shkodër ishte planifikuar të bëhej një aktivitet sportiv lidhur me garat me kuaj, dhe për këtë qëllim 30-vjeçari Arjan Ferracaku, kishte dalë të kalëronte së bashku me dy shokë të tij.
Sipas burimeve, 30 vjeçari Ferracaku rezulton të jetë djali, i një prej biznesmenëve më të njohur në zonën e Shkodrës, që drejtojnë biznese plastike dhe duralumini.
