Policia e Shtetit Shqiptar ka dhënë detaje në lidhje me drogën e kapur në brigjet e Brindisit, që sipas mediave italiane sasia prej 2.5 ton droge vinte nga Vlora.
Sipas policisë shqiptare nuk dihet ende origjina dhe vendi nga ku u nis gomonia drejt Italisë, ndërsa në operacion janë angazhuar Guardia di Finanza, Policia Kufitare Shqiptare dhe ajo e Malit të Zi.
NJOFTMI I POLICISE:
“Në datë 9 Qershor 2018, rreth orës 16:25, një avion i Guardia di Finanza të Pulias gjatë kontrollit në hapësirën detare, pikasi një mjet lundrues që lëvizte me shpejtësi në ujërat italiane, në largësi rreth 40 milje nga bregu.
Menjëherë në ndjekje janë vënë 2 mjete lundruese të GdF duke e interceptuar mjetin lundrues të llojit gomone, i cili ishte i ngarkuar dhe lëvizte me shpejtësi”, thuhet në njoftimin e policisë.
Më pas autoritetet italianë kanë njoftuar Policinë Kufitare në Shqipëri, ku menjehere disa mjete të Policisë Kufitare dhe të Guardia di Finanza në Durrës dhe Vlorë janë vënë në gadishmëri, në pritje të hyrjes së gomones në ujërat territoriale shqiptare. Por sipas policise shqiptare gomonia e ngarkuar, në ndjekje nga GdF ka shtuar shpejtësinë duke hedhur në det ngarkesën.
“Më pas ajo i është drejtuar territorit të Malit të Zi, duke u futur në këto ujëra. Policia malazeze e ka interceptuar gomonen, por pas një ndjekje për rreth 1 orë, ka humbur gjurmët e saj”.
Ndërkohë që Guardia di Finanza ka rikuperuar mallin e hedhur në det në ujërat ndërkombëtare në afërsi të ujërave territoriale të Malit të Zi, ku rezultoi 2 ton e 475 kilogramë marijuanë.
Autoritetet policore në 3 shtetet po vijojnë hetimet dhe shkëmbimin e informacionit për zbulimin dhe ndalimin e trafikantëve, por ende nuk ka të dhëna për origjinën e mallit dhe shtetin nga ku mund të jetë nisur gomonia.
