Kryetarja e LSI-së, Monika Kryemadhi, ka komentuar sot në emisionin “Kjo Javë” aktualitetin politik, por nuk ngurroi të fliste edhe për të ardhmen.
Kryemadhi u shpreh e bindur se shkarkimi i kreut të Prokurorisë së Krimeve të Rënda, Besim Hajdarmatajt ka qenë pjesë e një skenari të parapërgatitur nga Edi Rama, për të shpëtuar Saimir Tahirin.
“Ishte kompromis për dorëzimin e mandatit të zotit Tahiri. Të mos harrojmë që Hajdarmataj dhe të tjerët kërkuan arrestimin e Tahirit në tetor. Për mua kjo është vazhdimësia e lojës”, ka thënë ajo.
Kryetarja e LSI-së është pyetur nëse mendonte se mund të kishte në të ardhmen një arrestim për Tahirin, dhe ajo u shpreh kështu:
“Kush do ta arrestojë? Prokurorë që kanë probleme me veten e tyre me të shkuarën dhe atë që përfaqësojnë. Për mua situata tani ka mbetur shumë tragjike dhe largon Shqipërinë gjithnjë e më shumë nga dita e hapjes së negociatave. Situata ekonomike është alarmante, kjo si rezultat i një situate të tillë ku Edi Rama kapi edhe sistemin e drejtësisë.”
Kryemadhi akuzoi gjithashtu zëvendësen e Hajdarmatajt, Donika Prelën, si një ndër personat që kishte dijeni për vjedhjen e postës sekrete të Prokurorisë së Durrësit.
Duke kaluar më pas tek zhvillimet e fundit me vëllain e ministrit Xhafaj, Kryemadhi e cilësoi falsifikimin e një neni të kodit penal si një akt shumë të rëndë.
E pyetur për faktin se përse dosja u publikua tani dhe jo kur e konstatoi ish ministri teknik i PD, Gazment Bardhi, ajo u shpreh se “PD donte të ishte e sigurt, të mblidhte të gjitha të dhënat.”
