Familjarët e shqiptarëve që humbën jetën në aksidentin tragjik në Greqi, kanë folur për mediat greke duke përshkruar atë çfarë ndodhi. Bashkëshortja e viktimës 65-vjeçar të quajtur Spiro dhe e ëma e 34-vjeçares që mbeti e plagosur, rrëfen dhimbjen e saj.
“Çdo mëngjes, Spiro çon vajzën tonë në punë. Tani kam humbur burrin tim dhe vajzën e kam në prag të vdekjes nën kujdesin intensiv të mjekëve“, thotë gruaja e shqiptarit që humbi jetën në aksident.
Zemërim ka shprehur edhe nipi 34-vjeçar i viktimës së dytë të aksidentit, shqiptarit 60-vjeçar.
“Nëse e gjej, do ta vras me duart e mia”, ka thënë 34-vjeçari shqiptar për mediat greke, duke iu referuar shoferit të kamionit që shkaktoi aksidentin fatal.
Dy shqiptarë 60 dhe 65 vjeç kanë humbur jetën në një aksident të rëndë në autostradën Athinë – Lamia në orën 5:40.
Spiro Guri 60 vjeç dhe Dhimitër Pabuko 65 vjeç, humbën jetën, ndërsa një 34-vjeçare, Balerina Guri ka mbetur e plagosur. Ajo u dërgua në spitalin e Atikës për trajtim..
Shoferi 64-vjeçar që shkaktoi aksidentin nuk ka pësuar lëndime të rënda, por ka rezultuar pozitiv në testin e alkoolit dhe u arrestua menjëherë. 12 zjarrfikës me 4 mjete morën pjesë në operacionin e shpëtimit.
Sipas mediave në vendin fqinj, shoferi i kamionit që shkaktoi aksidentin e rëndë, ka pësuar dy fatkeqësi në jetë. Disa vite më parë, atij i kanë vrarë vëllain kurse më pas i vdiq edhe djali në një aksident me motor.
Mediat greke kanë publikuar videon kur shoferi i një kamioni ka humbur kontrollin e mjetit të tij dhe ka goditur dy makina duke i shkatërruar plotësisht dhe plagosur për vdekje dy shqiptarët.
