Konferenca e Kryetarëve në Kuvend e ka shtyrë marrjen një vendimi për të ngritur një komision hetimor parlamentar lidhur me çështjen “Tahiri”. Pasi nuk i hoqi imunitetin, duke e shpëtuar nga arrestimi, mazhoranca në qeverisje e drejtuar nga Edi Rama është në dyshim edhe për ngritjen komisionit hetimor që ka kërkuar opozita e kryesuar nga PD.
Në Konferencën e Kryetarëve janë bërë debate në lidhje me këtë komision. PD ka kërkuar ngritjen e tij, kurse PS ka kërkuar kohë.
Kryetari i Grupit të PS, Taulant Balla është shprehur se “në parim jemi dakord që të ngrihet një komision. Kërkojmë disa ditë kohë të përgatisim një projektvendim”.
Siç duket socialistëve u duhet pak kohë për të përgatitur një riformulim të kërkesës për ngritjen e komisionit.
Kryetari i Grupit të PD, Edmond Spaho, ka kundërshtuar shtyrjen e datës për marrjen e një vendimi, duke deklaruar se PS ka pasur një javë kohë ta punojë dokumentin që kërkon, pasi kërkesa ishte dorëzuar para një jave. Kryetari i Grupit të PD, Edmond Spaho, deklaroi se nuk u mor asnjë vendim pasi si gjithnjë synohet zvarritja e kësaj çështjeje.
“Pa involvimin e kryeministrit, tha Spaho, nuk do të ishte shtyrë kjo çështje që praktikisht është mbyllur”.
Më 12 shkurt 2018, kryetari i PD Lulzim Basha deklaroi se PD ka depozituar kërkesën për ngritjen e një komisioni hetimor për rastin “Tahiri”.
Basha shpjegoi se “iI gjithë opinioni e di se në dy vite kur Shqipëria shndërrohej në hambar të drogës, ministria e Brendshme, Policia, institucionet ishin në dijeni se kjo bëhej me përfshirjen e drejtpërdrejtë të Policisë së Shtetit dhe me bekimin e atyre, kupolës më të lartë të shtetit.
