Ish-Kryeministri Sali Berisha tha sot gjatë një interviste në ‘byro politike’ të Juli Xhokaxhi se Lulzim Basha nuk e ka imituar atë. “Lulzim Basha, një nga gjërat më pozitive që ka është se nuk tentoi të më imitojë, duke shtuar se imitimet janë jo të frutshme”, tha Berisha.
Berisha tha se opozita duhet të analizojë mirë protestën, ajo ka mesazhin e saj të fuqishëm. “Kjo opozitë duhet të kombinojë të gjitha format, gjer në diversitetin e formave të mosbindjes civile, manuali parashikon 52 forma”, tha Berisha. Në vijim, referuar një analize të botuar në një bloger të njohur Berisha tha se 3 mesazhe jepte analisti: hedhja në erë e reformës në drejtësi, kanabizimi dhe intimidimi i gazetarëve. Në këtë kuadër, Berisha tha se kjo është PR-ja më e tmerrshme për Tiranën zyrtare në botë.
Në vijim Berisha tha se hapja e negociatave ëhstë kushtëzuar me Saimir Tahirin.
“Po ua them se na kanë thënë se hapja e negociatave kushtëzohet me çështjen Tahiri. Rama bllokoi drejtësinë, nëse do e kishte lënë pa imunitet do i lante duart. Këtu Rama morri direkt përgjegjësi”, tha Berisha.
Në vijim ish-Kryeministri Sali Berisha tha se nuk angazhohet në një luftë të brendshme në Partinë Demokratike.Ai shpjegoi se angazhimi i tij ka të bëjë me mbrojtjen e interesit publik dhe me asgjë tjetër. “Thelbi i intelektualit është mbrojtja e interesit publik. Unë kam dhënë dorëheqjen si kryetar i PD-së, por kam thënë se nuk e jap Sali Berishën”, tha Berisha, duke shtuar se “unë kam qenë kalorës në fushën time”.
