Në fshatin turistik të Ksamilit ka ndodhur një grabitje gjatë orëve të natës. Persona të paidentifikuar, me maska në kokë dhe armë në dorë kanë dhunuar pronarin e banesës dhe kanë grabitur edhe vilën e tij 3-katëshe.
Grabitësit e maskuar kanë hyrë në banesë dhe e kanë dhunuar pronarin me inicialet P. L., pasi e kishin lidhur.
Njoftimi paraprak i policisë:
Më datë 12.01.2018, Salla Operative Sarandë është njoftuar prej shtetasit P.L., se në banesën e tij i kanë shkuar tre shtetas të maskuar dhe te pajisur me armë zjarri, ku e kanë rrahur e lidhur.
Shërbimet Policore kanë shkuar menjëherë pranë vendit të ngjarjes dhe nga verifikimi paraprak ka rezultuar se:
Në Ksamil, rreth orës 07:30, në banesën e shtetasit P.L., (ndërtesë tre katëshe, e cila përdoret si shtëpi pushimi gjatë sezonit veror), kanë shkuar tre shtetas të maskuar e të armatosur me armë zjarri, të cilin e kanë rrahur e goditur me qytën e armës dhe e kanë lidhur.
Autorët e maskuar i kanë marrë çelsat e banesës dhe kanë hyrë për të vjedhur.
Më pas i kanë marrë dhe mjetin tip “Benz”, me targa AA 322 DP, dhe janë larguar.
Policia ka ngritur pika kontrolli me qëllim identifikimin dhe kapjen e autorëve.
Grupi hetimor ka nisur punën për zbardhjen e plotë të ngjarjes.
